"Tibbiyotda Innovatsiyalar"-nizomi

“Tasdiqlayman”

Buxoro Innovatsion ta’lim va tibbiyot Universiteti MCHJ rahbari

_____________ F.F. Umurov

28 yanvar 2025 y.

“TIBBIYOTDA INNOVATSIYALAR”

JURNALI TAHRIRIYATINING NIZOMI

Buxoro — 2025 yil

I. Umumiy qoidalar

“Tibbiyotda innovatsiyalar” jurnali (bundan buyon matnda “Jurnal” deb yuritiladi) ommaviy axborot vositalari to‘g‘risidagi qonun hujjatlariga muvofiq Buxoro Innovatsion ta’lim va tibbiyot universiteti mas’uliyati cheklangan jamiyati rahbari Umurov Feruz Faxriddinovich (bundan buyon matnda “muassis” deb yuritiladi) tomonidan Buxoro Innovatsion ta’lim va tibbiyot universiteti qoshida ta’sis etilmoqda.

Jurnalning muassisi uning noshiri hisoblanadi. Buxoro Innovatsion ta’lim va tibbiyot universiteti mas’uliyati cheklangan jamiyati rahbari Umurov Feruz Faxriddinovich o‘zining noshirlik faoliyati bilan shug‘ullanish huquqini beruvchi №639805 raqamli, Agentlik tomonidan yuritiladigan noshirlik subyektlari reestrida X-25475 raqami bilan ro‘yxatdan o‘tgan.

Jurnalning muassisi uning noshiri hisoblanadi.

1.1. Jurnal bir yilda o‘n ikki marta, o‘zbek, rus, ingliz tillarida nashr etiladi.

1.2. Nashrning asosiy jihatlari quyidagilardan iborat:

• formati — A-4;
• nashrning tili — o‘zbek, rus, ingliz tillari;
• hajmi — 200 dan ortiq sahifa;
• tarqatilish usuli — ijtimoiy tarmoq orqali;
• tarqatiladigan hududi — O‘zbekiston Respublikasi miqyosida.

1.3. Jurnal muassisi: Buxoro Innovatsion ta’lim va tibbiyot universiteti mas’uliyati cheklangan jamiyati rahbari Feruz Umurov Faxriddinovich;

• elektron pochta manzili: info@biti.uz;
• jurnalning web sayt havolasi: https://biti.uz/gazeta/;
• manzil: Buxoro viloyati, Buxoro shahri, Namozgoh ko‘chasi, 112-uy;
• tel: +998 97 303 70 07.

1.4. Muassis jurnalni nashr etish, uni tarqatish hamda ushbu Nizomda ko‘rsatib o‘tilgan faoliyatni bajarish uchun jurnal (bundan buyon matnda “Tahririyat” deb yuritiladi) bilan o‘zaro shartnoma tuzadi.

1.5. Tahririyat yuridik maqomga ega. U Buxoro Innovatsion ta’lim va tibbiyot universiteti MCHJ logotipi tushirilgan, Tibbiyotda innovatsiyalar nomi yozilgan yumaloq muhri, shtamplari, blankalari, ish qog‘ozlari, banklarda hisob-kitob raqamlari asosida ish yuritadi.

1.6. Jurnal fan, tibbiyot va texnologiyalarning ilmiy-nazariy va ilmiy-amaliy soha yo‘nalishiga ixtisoslashgan.

1.7. Tahririyatning manzili: Buxoro viloyati, Buxoro shahri, Namozgoh ko‘chasi, 112-uy, tel: +998 97 303 70 07.

1.8. Tahririyat o‘z faoliyatini O‘zbekiston Respublikasi Konstitutsiyasiga, “Ommaviy axborot vositalari to‘g‘risida”gi qonunga, O‘zbekiston Respublikasining boshqa qonun hujjatlariga hamda ushbu Nizomga muvofiq amalga oshiradi.

II. Tahririyatning maqsad va vazifalari

2.1. Tahririyatning asosiy maqsad va vazifalari quyidagilardan iborat:

• Nizomda belgilangan tibbiyotning barcha yo‘nalishlarida tibbiy innovatsion ilmiy ishlarni, materiallarni keng targ‘ib qilish;
• hukumatning tibbiyotda ilm-fanni qo‘llab-quvvatlash va rivojlantirish borasidagi siyosatini keng targ‘ib qilish;
• Respublika miqyosida olib borilayotgan tibbiyot sohasidagi ilmiy yo‘nalishdagi izlanishlarni targ‘ib qilish;
• tibbiy-ilmiy-amaliy faoliyat, sport-sog‘lomlashtirish sohasidagi ishlarini keng yoritish;
• professor va o‘qituvchilar, yosh olimlar, magistrantlar hamda iqtidorli talabalarning ilmiy izlanishlari natijalari, tibbiyotda erishgan yutuqlari va kashfiyotlari haqidagi maqolalarni berib borish;
• talaba yoshlarning tibbiy savodxonligini oshirish, klinik dunyoqarashini boyitish, qo‘lga kiritilayotgan yutuqlar va barcha sohalardagi ilg‘or tajribalarni keng tibbiyot xodimlariga yetkazishda targ‘ibot va tashviqot ishlarni olib borish.

2.2. Tahririyat ko‘rsatib o‘tilgan maqsadlarga erishish uchun quyidagi asosiy vazifalarni amalga oshiradi:

• Respublika miqyosida materiallarni, olimlar, magistrantlar va iqtidorli talabalarning ilmiy izlanishlari, ixtirolari va fanga kiritgan yangiliklarini e’lon qilib borish;
• tibbiyot, fan va ishlab chiqarish integratsiyasini rivojlantirish maqsadida hamkorlikda olib boriladigan ilmiy-amaliy ishlarni yoritib borish;
• O‘zbekiston Respublikasi qonun hujjatlarida taqiqlanmagan boshqa faoliyat turlari bilan shug‘ullanadi.

III. Muassisning huquqlari

Muassis — boshqaruvning oliy organi hisoblanadi. U Tahririyat faoliyatining har qanday masalalari bo‘yicha qaror qabul qilish vakolatiga egadir.

Muassisning vakolat doirasiga jumladan quyidagilar kiradi:

• tahririyat Nizomini qarab chiqish, tasdiqlash va unga o‘zgartirish va qo‘shimchalar kiritish, tahririyatni tartibga solib turuvchi boshqa hujjatlarni tasdiqlash va o‘zgartirish kiritish;
• tahririyat rejalari va hisobotlarini qarab chiqish hamda tasdiqlash, ustav fondini va boshqa fondlarni tasdiqlash yoki o‘zgartirish to‘g‘risidagi masalalarni hal etish;
• jurnal faoliyati dasturini tasdiqlash;
• tijorat faoliyatidan tushgan mablag‘larni tasarruf etish;
• jurnal bosh muharririni, tahririyat xodimlarini, tahrir hay’ati a’zolarini lavozimga tayinlash va lavozimidan ozod etish;
• belgilangan tartibda jurnalning ilovalarini chiqarish, bosmaxona tashkil qilish va boshqa matbaa mahsulotlarini chiqarish, shu bilan birga yuridik va jismoniy shaxslar bilan, shu jumladan homiylar bilan shartnoma asosida ish yuritishi mumkin;
• tahririyat faoliyatini hamda uning bo‘limlari faoliyatini tekshirish uchun uch kishidan iborat bo‘lgan va uch yil faoliyat ko‘rsatadigan taftish komissiyasini tuzish;
• muassis ommaviy axborot vositasining faoliyati tugatilgan taqdirda kreditorlar bilan hisob-kitobni amalga oshiradi.

Muassis:

• ommaviy axborot vositasining ro‘yxatda qayd etilgan nomidan foydalanish va uni tasarruf etish;
• tahririyatning boshqaruv organlarini shakllantirishda ta’sis shartnomasi, tahririyat Nizomi va qonun hujjatlarida belgilangan tartibda ishtirok etish;
• foydani taqsimlashda va zararni qoplashda ishtirok etish;
• ommaviy axborot vositasining eng katta hajmi va chiqariladigan muddatini belgilash;
• tahririyat Nizomiga yoki muassis va tahririyat o‘rtasidagi shartnomaga muvofiq belgilanadigan, reklama tusida bo‘lmagan xabar yoki materialni o‘z nomidan ommaviy axborot vositasida bepul joylashtirish;
• tahririyatning faoliyati tugatilgan taqdirda, kreditorlar bilan hisob-kitob qilinganidan keyin qolgan mol-mulkni yoki uning qiymatini qonun hujjatlarida nazarda tutilgan tartibda olish huquqiga ega;
• muassis qonun hujjatlariga muvofiq boshqa huquqlarga ham ega bo‘lishi mumkin.

IV. Muassisning majburiyatlari

4.1. Muassis Tahririyatning buxgalterlik va statistik hisob-kitoblarini amalga oshiradi.

4.2. Muassis ommaviy axborot vositasining faoliyatini senzura qilmaydi va Tahririyatning ijodiy faoliyatiga aralashmaydi.

4.3. Jurnalning moliyaviy faoliyatini Muassis olib boradi. Tahririyat jismoniy va yuridik shaxslar bilan jurnal faoliyatiga doir shartnomalar tuzadi. Jumladan, Muassis ham yuridik va jismoniy shaxslar bilan, shu jumladan homiylar bilan shartnoma tuzishi mumkin.

Muassis:

• tahririyatni tashkil etadi;
• tahririyat Nizomini tasdiqlaydi;
• tahririyat bilan shartnoma tuzadi;
• ommaviy axborot vositasining chiqarilishini ta’minlaydi;
• “Ommaviy axborot vositalari to‘g‘risida”gi Qonun hujjatlariga rioya etilishini ta’minlaydi;
• Muassisning Nizom fondi o‘zgarganligi haqida, agar Nizom fondida chet el investitsiyalari ulushi “Ommaviy axborot vositalari to‘g‘risida”gi Qonunning 8-moddasining 4-qismida nazarda tutilgan chegaradan ortib ketgan bo‘lsa, O‘zbekiston Respublikasi Vazirlar Mahkamasi tomonidan belgilangan vakolatli davlat organini xabardor etishi shart;
• Muassisning zimmasida qonun hujjatlariga muvofiq boshqa majburiyatlar ham bo‘lishi mumkin.

V. Tahririyatning huquqlari

5.1. Tahririyat ushbu Nizomdagi maqsadlarga erishish yo‘lida quyidagi huquqlarga ega bo‘ladi:

• xodimlarni muayyan ishlarni bajarish uchun shartnoma asosida vaqtincha ishga qabul qilish, vaqtinchalik mehnat jamoalarini tuzish bo‘yicha Muassisga takliflar tayyorlaydi;
• muassisning transport vositalaridan, binolaridan, qurilmalari va boshqa texnika vositalaridan, mol-mulkidan foydalanadi;
• xalqaro tashkilotlarning, O‘zbekiston hamda chet el jismoniy va yuridik shaxslarining badallarini belgilangan tartibda qabul qiladi va ulardan tahririyat Nizomida ko‘rsatilgan maqsad va vazifalarga muvofiq holda foydalanadi;
• turli mavzudagi ijodiy tanlovlarda ishtirok etadi.

5.2. Mualliflarning maqolalari hamda xatlardan foydalanayotganda ularni tahrir qilish, qisqartirish tahririyatning huquqi hisoblanib, ularning mazmuni saqlab qolinishi qonunda belgilangan tartibda amalga oshiriladi.

5.3. Jurnalning yuqori salohiyatli bo‘lishi uchun chet mualliflarning materiallaridan foydalanadi.

5.4. Tahririyat yuridik va jismoniy shaxslar bilan o‘z nomidan ish olib boradi.

5.5. Tahririyat jarimaga qaratilishi mumkin bo‘lgan hollarda Tahririyatning mol-mulki hisobidan, agar buning imkoni bo‘lmagan taqdirdagina Muassis hisobidan belgilangan tartibda javob beriladi.

VI. Tahririyatning majburiyatlari

Tahririyat jurnalni chiqarish bilan bog‘liq faoliyatni amalga oshiradi, o‘z faoliyatining natijasi bo‘yicha muassis oldida mas’ul bo‘ladi.

Tahririyat jurnalni Nizomda belgilangan davriylikda, hajmda va o‘z vaqtida chiqarilishini ta’minlaydi.

Tahririyat o‘z mahsulotlarining sifati bo‘yicha iste’molchilarning huquq va qonuniy manfaatlariga rioya etadi.

Tahririyat chop etishga tayyor bo‘lgan jurnalning homaki sahifasini hamda e’lon qilinishi kutilayotgan maqolalarni zarurat taqozo qilgandagina Muassisga taqdim etishi mumkin.

Tahririyat o‘z faoliyati davomida sohaga doir Qonunlar va boshqa me’yoriy hujjatlarga rioya etilishini ta’minlaydi.

VII. Tahririyat faoliyatini moliyalashtirish tartibi

Tahririyat mol-mulki muassisga tegishli bo‘lgan mol-mulkdan tarkib topadi.

Tahririyat quyidagi manbalardan moliyalashtiriladi:

• jurnal tirajini realizatsiya qilishdan tushgan foyda;
• turli ko‘rinishdagi ishlab chiqarish va tijorat faoliyatidan orttirilgan daromad;
• yuridik va jismoniy shaxslar tomonidan berilgan yordam va xayriya mablag‘lari;
• qonun hujjatlarida taqiqlanmagan boshqa manbalar.

Tahririyatning nizom fondi 100% (yuz foiz) Buxoro Innovatsion ta’lim va tibbiyot universiteti MCHJ rahbari Umurov Feruz Faxriddinovichga tegishli.

VIII. Boshqaruv va nazorat organlari

8.1. Muassis — boshqaruvning oliy organi hisoblanadi. U Tahririyat faoliyatining har qanday masalalari bo‘yicha qaror qabul qilish vakolatiga egadir.

8.2. Muassis:

• tahririyat Nizomini, Tahririyatni tartibga solib turuvchi boshqa hujjatlarni tasdiqlaydi va o‘zgartirish kiritadi;
• tahririyat rejalari va hisobotlarini qarab chiqadi hamda tasdiqlaydi;
• nizom fondini va boshqa fondlarni tasdiqlash yoki o‘zgartirish to‘g‘risidagi masalalarni hal etadi;
• jurnal faoliyatidan tushgan mablag‘larni tasarruf etadi;
• jurnal muharriri, tahrir hay’ati a’zolarini lavozimga tayinlaydi va lavozimidan ozod etadi.

8.3. Tahririyatga muharrir rahbarlik qiladi, qaror qabul qilish va ijro etish huquqiga ega, tahririyat a’zolariga muassis tomonidan biriktirilgan TAHRIRIYAT KENGASHI RAISI mas’ul. Muharrir sud organlarida va boshqa organlarda jurnal nomidan ish ko‘radi, bu masalani muassis bilan kelishgan holda boshqa shaxslarga ham topshirishi mumkin.

8.4. Muharrir jurnal zimmasiga yuklatilgan vazifalardan kelib chiqqan holda qonun hujjatlariga muvofiq belgilangan tartibda xodimlarni moddiy rag‘batlantirish, hamda ularga intizomiy jazo choralarini qo‘llash, ishga qabul qilish yoki ishdan bo‘shatish, mehnat ta’tillarini berish, xizmat safarlariga jo‘natish bo‘yicha muassisga takliflar kiritadi.

8.5. Muharrir Muassis bilan kelishgan holda bir oylik ish haqi fondi doirasida tahririyat tuzilmasiga va shtatiga o‘zgartirishlar kiritish, ustama haqlar belgilash bo‘yicha takliflar tayyorlaydi va Muassisga taqdim etadi.

8.6. Tahririyat faoliyatini tekshirish uchun Muassis jamoatchiligi tomonidan taftish komissiyasi tuziladi. Taftish komissiyasi jamoatchilik asosida ishlovchi uch kishidan iborat bo‘ladi va uch yil faoliyat ko‘rsatadi.

8.7. Taftish komissiyasi jurnal manfaatlari uchun xavf tug‘ilsa yoki mansabdor shaxslar tomonidan suiste’molchilikka yo‘l qo‘yilgani aniqlansa, buni Muassisga darhol xabar qiladi.

8.8. Tahrir hay’ati jurnalning ilmiy saviyasi, unda berilayotgan materiallarning qonunchilikka mosligi, jurnalning dizayni va o‘qimishliligini o‘rganib borib, ijodiy xodimlar o‘rtasida muhokama qiladi.

IX. Foydani taqsimlash va zararlarning o‘rnini qoplash tartibi

9.1. Tahririyatning nizom fondi 100% (yuz foiz) Buxoro Innovatsion ta’lim va tibbiyot universiteti MCHJ rahbari Umurov Feruz Faxriddinovichga tegishli.

9.2. Tahririyat xo‘jalik faoliyatining moliyaviy ko‘rsatkichi Muassisning foydasi hisoblanadi. Jurnal faoliyatidan olingan foydadan soliqlar va byudjetga boshqa majburiy to&lovlar to‘lab bo‘lingach, qolgan sof foyda muassisning hisobida qoladi. Muassis xohishiga ko‘ra jurnalni rivojlantirish uchun o‘z foydasining ma’lum qismini ajratishi mumkin. Shundan jarimalar to‘lanadi, qolgan qismidan esa iste’mol fondi va jamg‘arma fondi hosil qilinadi.

9.3. Buxoro Innovatsion ta’lim va tibbiyot universiteti MCHJ iste’mol fondidan Tahririyat xodimlarining mehnatiga haq to‘lanadi. Tahririyat xodimlari mehnatiga haq to‘lash tartibi Muassis umumiy yig‘ilishi qarori bilan tasdiqlanadi. Tahririyat xodimlari ish haqining eng kam miqdori O‘zbekiston Respublikasida belgilangan eng kam ish haqidan oz bo‘lishi mumkin emas.

9.4. Tahririyat mehnat jamoasiga xizmat ko‘rsatayotgan, lekin Tahririyat a’zolari safida bo‘lmagan tibbiy, o‘quv va sport muassasalarining va boshqa tashkilotlarning xodimlarini moddiy rag‘batlantirishga muassisga takliflar tayyorlaydi.

9.5. Tashkil etilgan jamg‘arma fondidan muassis umumiy yig‘ilishining qarori bilan Tahririyat faoliyatini kengaytirish va zamonaviy axborot texnologiyalari sotib olishga mablag‘ ajratiladi.

9.6. Tahririyat xodimlari tomonidan foydalanilayotgan Muassisning mol-mulkiga zarar yetkazilganda qonunchilikda belgilangan tartibda zarar yetkazgan xodim hisobidan qoplanadi.

9.7. Jurnalning nashr etilishidan olinadigan sof foyda Muassisda qolib, Muassis ixtiyoriga ko‘ra, jurnalni rivojlantirish uchun o‘z foydasining ma’lum qismini ajratishi mumkin.

9.8. Tahririyatni tugatish jarayonida qolgan mol-mulklar belgilangan tartibda Muassisda qoladi hamda faoliyat davomida ko‘rilgan zararni ham Muassis qoplaydi.

9.9. Ommaviy axborot vositasining faoliyati tugatilgan taqdirda kreditorlar bilan hisob-kitobni Muassis amalga oshiradi.

9.10. Jurnalda Buxoro Innovatsion ta’lim va tibbiyot universiteti professor-o‘qituvchilari tomonidan berilgan maqolalar uchun imtiyozlar beriladi. Shu qatorda foyda va zarar uchun faqat muassisning o‘zi javobgar hisoblanadi.

X. Ommaviy axborot vositasining chiqarilishini to‘xtatib turish yoki tugatish asoslari va tartibi

10.1. Ommaviy axborot vositasining chiqarilishini to‘xtatib turish yoki tugatish ro‘yxatdan o‘tkazuvchi organning arizasi asosida sudning qaroriga ko‘ra amalga oshiriladi.

10.2. Muassis ommaviy axborot vositasining chiqarilishini Tahririyat Nizomida yoki Muassis va Tahririyat o‘rtasida tuzilgan shartnomada nazarda tutilgan hollarda hamda belgilangan tartibda to‘xtatib turish yoki tugatishga haqlidir.

10.3. Muassis ommaviy axborot vositasining chiqarilishini to‘xtatib turish yoki tugatish to‘g‘risidagi qaror qabul qilingandan keyin o‘z qarori haqida ro‘yxatdan o‘tkazuvchi organni uch kun ichida yozma shaklda xabardor etishi shart. Mazkur xabarnoma ushbu ommaviy axborot vositasi chiqarilishini to‘xtatib turilishi yoki tugatilishidan oldingi so‘nggi chiqarilishlaridan biriga joylashtiriladi.

10.4. Ommaviy axborot vositasi chiqarilishini qayta boshlash ro‘yxatdan o‘tkazuvchi organ aniqlagan qonun hujjatlari buzilishlari bartaraf etilganligini tasdiqlovchi ma’lumotlar Muassis va (yoki) tahririyat tomonidan sudga taqdim etilganidan keyin sud qaroriga asosan amalga oshiriladi.

10.5. Ommaviy axborot vositasining chiqarilishini tugatish to‘g‘risida sud tomonidan qaror chiqarish uchun quyidagilar asos bo‘lishi mumkin:

• “Ommaviy axborot vositalari to‘g‘risida”gi Qonun hujjatlari talabi tahririyat tomonidan muntazam ravishda buzib kelinganligi, bu haqda ro‘yxatdan o‘tkazuvchi organ tomonidan Muassis va (yoki) Tahririyat nomiga ilgari yozma ogohlantirishlar yuborilganligi;
• sudning ommaviy axborot vositasini chiqarishni to‘xtatib turish haqidagi qarori bajarilmaganligi;
• ommaviy axborot vositasining olti oydan ziyod vaqt mobaynida chiqarilmaganligi;
• qonun hujjatlarida belgilangan boshqa hollar.

10.6. Ommaviy axborot vositasi davlat reestridan chiqarilgan kundan boshlab tugatilgan deb hisoblanadi.

XI. Tahririyatni qayta tashkil etish va tugatish tartibi

11.1. Tahririyat qonun hujjatlarida nazarda tutilgan har qanday tashkiliy-huquqiy shaklda tashkil etilishi mumkin.

11.2. Ommaviy axborot vositasini chiqarilishini tugatish to‘g‘risida muassis tomonidan qaror qabul qilingan taqdirda tahririyat muassisning ruxsati bilan xuddi shunday nomdagi ommaviy axborot vositasini belgilangan tartibda ta’sis etishga haqlidir. Bunday holda ommaviy axborot vositasini qayta ro‘yxatdan o‘tkazish talab qilinadi.

11.3. Jurnal chiqarilishini to‘xtatib turish yoki tugatish ro‘yxatdan o‘tkazuvchi organning arizasi asosida sudning qaroriga ko‘ra amalga oshiriladi.

11.4. Sudning qaroriga asosan ommaviy axborot vositasining chiqarilishi quyidagi hollarda tugatiladi:

• “Ommaviy axborot vositalari to‘g‘risida”gi Qonun hujjatlari talablari tahririyat tomonidan muntazam buzilib kelganda;
• sudning ommaviy axborot vositasini chiqarishni to‘xtatib turish haqidagi qarori bajarilmaganda;
• jurnal olti oydan ziyod vaqt mobaynida chiqarilmaganda va qonun hujjatlarida belgilangan boshqa hollarda.

11.5. Muassisning qaroriga asosan ham belgilangan tartibda tahririyat faoliyati tugatilishi mumkin.

11.6. Tahririyat faoliyatida ushbu Nizomning II bandida qayd etilgan maqsad va vazifalardan chekinish, amaldagi qonunlar doirasidan chiqish holatlari yuz bergan taqdirda Muassis qaroriga asosan tahririyat tugatilishi va qayta tashkil etilishi mumkin.

XII. Nizomni qabul qilish va unga o‘zgartirishlar kiritish tartibi

12.1. Nizom Muassis joriy etgan kengash qarori bilan qabul qilinib, muassis tomonidan tasdiqlanadi.

12.2. Muassis joriy etilgan kengash tarkibini o‘zi tasdiqlaydi.

12.3. “Ommaviy axborot vositalari to‘g‘risida”gi O‘zbekiston Respublikasi Qonunining 20-moddasi birinchi qismining ikkinchi-beshinchi xatboshilarida, shuningdek, ikkinchi qismida ko‘rsatilgan ma’lumotlar va hujjatlarga ommaviy axborot vositasi ro‘yxatdan o‘tkazilgandan so‘ng o‘zgartirishlar kiritilgan taqdirda Nizomga o‘zgartirishlar kiritiladi. Bunday holda ommaviy axborot vositasi qayta ro‘yxatdan o‘tkaziladi.

XIII. Muharrir va xodimlar o‘rtasidagi munosabat

13.1. Muharrir Muassis tomonidan ishga qabul qilinadi va vazifasidan ozod etiladi. Muharrir o‘z vakolatlari doirasida tahrir hay’atiga, tahririyat jamoasiga rahbarlik qiladi. Jurnalning har bir sonini bosish uchun ruxsat berib, sahifalarni imzolaydi. Muharrir o‘rinbosari Muharrir ish faoliyatida bo‘lmagan vaqtda jurnalning har bir sonini bosish uchun ruxsat berib, sahifalarni imzolash huquqiga ega.

13.2. Muharrir Muassisning qarorlarini bajarilishini tashkil etadi va Muassisga bo‘ysunadi hamda ushbu Nizomga asosan ish yuritadi.

13.3. O‘zbekiston Respublikasining “Ommaviy axborot vositalari to‘g‘risida”gi qonunining 6-moddasiga qat’iy asoslangan holda ommaviy axborot vositalaridan g‘arazli maqsadlarda foydalanishga yo‘l qo‘ymaslik uchun Muharrir qonunda belgilangan tartibda javobgar hisoblanadi.

13.4. Jurnalning har bir sonini mazmunli tayyorlanishi hamda materiallarning bosmaxonaga o‘z vaqtida topshirilishi uchun mas’ul hisoblanadi.

13.5. Tahririyat xodimlari qonunda belgilangan barcha huquqlardan foydalanadilar, jurnalning o‘qimishli bo‘lishini ta’minlaydilar hamda mehnat shartnomasiga qat’iy rioya qiladilar.

13.6. Tahririyat xodimlari tayyorlangan maqolalar va materiallarning haqqoniyligi uchun shaxsan javobgar bo‘ladilar.

XIV. Uchinchi shaxslar bilan munosabatlar

14.1. Muassis jurnal faoliyati bilan bog‘liq uchinchi shaxslar bilan munosabatlarni to‘g‘ridan-to‘g‘ri o‘zi amalga oshiradi.

14.2. Muassis Tahririyat bilan jismoniy va yuridik shaxslar bilan shartnomalar tuzadi, tuzilgan shartnomalarning qonunchilikka mosligi va bajarilishi yuzasidan javobgarlikni o‘z zimmasiga oladi.

14.3. Tahririyat muassisning topshirig‘i bilan uchinchi shaxslar bilan muassis nomidan ish ko‘rishi mumkin.

XV. Yakunlovchi qoidalar

15.1. Tahririyat va uning xodimlari O‘zbekiston Respublikasi Qonunlarida belgilangan barcha huquqlardan foydalanadi va majburiyatlarni bajaradi.

15.2. Tahririyat rahbariyati va xodimlar tahririyatning xizmat va tijorat siri bo‘lgan axborotlarni sir saqlashga majburdirlar. Bunday sirlarni oshkor etganlik uchun ular qonunda belgilangan tartibda javobgar hisoblanadilar.

15.3. Ushbu Nizom jurnal davlat ro‘yxatiga olingan kundan e’tiboran kuchga kiradi.

15.4. Nizomga kiritilgan barcha o‘zgartirish va qo‘shimchalar ham davlat ro‘yxatidan o‘tgach kuchga kiradi.

15.5. Ushbu Nizom to‘rt nusxada tuzilgan bo‘lib, ularning barchasi bir xil kuchga egadir.

Asosiy tashkiliy qo‘mita a’zolari:

Muassis va muharrir: F.F. Umurov

Muharrir o‘rinbosari: M.M. Amonova

Dizayner: N. Qurbonov

Muassis tomonidan tashkil etilgan kengash a’zolari:

Tahririyat kengashi raisi:	Yu.S. Beshimov
Tahririyat a’zolari:	K.Ya. Baxronova F.F. Umurov E.S. Sa’diyev I.B. Shukurov M.F. Yaxshiyeva